NOTÌZIAS E CONTOS Uddusó. Una chida a giru in Ispagna pro 102 Uddusoinos, chi cun su viàgiu organizadu dae su Comune ant àpidu sa possibilidade de bìdere e connoschere sa tzitade de Barcellona e àteros logos ispantosos a curtzu a cue.
Partidos dae Uddusó lunis, su 23 de santu gaine a ora de mesu die, si sunt tratesos in Ispagna finas a su sàpadu, su 28 a parte de sero. In custa chida ispagnola ant inghiriadu cun ispantu sos logos de prus importu de Barcelona, Tossa de Mar, Loret de Mar e àteras biddas de importu mannu pro istòria e bellesas.
“Est istada un’esperièntzia bella meda – at nadu Francesca Spanu, assessora a sos servìtzios sotziales de Uddusó -. Una chida dedicada a sa cultura, a sa connoschèntzia de logos e culturas noas, ma pius de totu est istada una chidada de ispàssiu e un’ocasione bella pro istare impare pro totus custa zente, augurende-lis de bi torrare a 100 annos”.
