NOTIZÌAS E CONTOS Sa Polisportiva de Uddusò est una sotziedade istòrica in Sardigna, chi oramai dae 60 annos ogni domìniga ispàssiat e divertit sos apassionados de fùbalu de sa bidda e de totu s’ìsula.
Totu naschet in su 1963 cando Mario Casula, isportivu apassionadu de Belchidda cojuadu a Uddusò detzidet de aunire sos giòvanos de sa bidda, chi finas a tando giogaiant in sas iscuadras de sos bighinados, pro formare s’iscuadra iscriende-la a su campionatu de 2° categoria.
Iscuadra chi in custos 60 annos at giogadu in totus cantas sas categorias regionales e de sa cale ant fatu parte isportivos meda e pro custu motivu sa dirigèntzia de como at detzisu de organizare una serada pensada pròpiu cun s’intentu de ammentare sas persones chi ant fraigadu s’istòria.
Sàpadu 25 de su mese de Santu Andria, a parte de manzanu sa sotziedade at retzidu su prèmiu pro sos 60 annos de atividade, cunsignadu in Roma dae su presidente de sa federatzione natzionale Gabriele Gravina, imbetze su sero in su Hotel La Madonnina de Uddusò est istada fata custa bella festa in ue a manera particulare sunt istados mentovados e ammentados sos 28 presidentes chi ant ghiadu s’iscuadra in custu caminu e difatis su presidente de como Stefano Chiavacci a pustis de sa chena, a sa cale ant partetzipadu dirigentes, giogadores e tifosos, at cunsignadu una pergamena a sos presidentes betzos e a sos parentes de cussos chi in sos annos ant lassadu custa terra.
Momentos e ammentos bellos de òmines, famìlias e situatziones isportivas chi totus impare ant fatu a manera chi s’iscuadra siat intrada in su coro de totu sos Uddusoinos e de totus sos giogadores e sos allenadores furisteris chi in Uddusò ant agatadu non solu un’iscuadra ma unu logu pienu de amigos diventados astrintos comente frades. Sàpadu ognunu de custos at àpidu sa possibilidade de ammentare carchi situatzione particulare, cun paràulas, contos e fotografias, mustrende a totus cantu est istada importante custa sotziedade sia pro cantu pertocat s’isport ma finas pro sa sotzialidade de sa bidda.
“Sa serada de sàpadu at mustradu totu s’afetu chi sa bidda de Uddusò at pro sa Polisportiva e pro custos 60 annos de istòria. Nois dirigentes de como semus cuntentos meda de custu e amus saludadu sos apassionados cun sa promissa chi dae parte nostra s’impignu e sa passione pro custos colores no at a bènnere mai mancu” sas paràulas de Stefano Chiavacci.
