NOTÌZIAS E CONTOS Sàpadu 23 de Nadale in sa Creja de Santu Chirigu in Uddusò su Coro Santa Nostasia e s’Istituto Chircas ant organizadu una serada de mùsica e de traditzione pro gloriare s’arrivu de sa Pasca de Nadale e l’ant fatu in dae in antis a unu pùblicu numerosu chi no at chèrfidu pèrdere custa bella manifestatzione in ue si sunt esibidos sos meres de domo de su Coro Santa Nostasia, su Coro Sant’Alene de Tula e su Coro Boci d’Agliola de Telti.
Sa serada est istada presentada dae sa famada artista Oschiresa Carla Denule chi a sa fine at cantadu finas carchi cantone fatende emotzionare totus cantu su pùblicu presente.
Sa serada at leadu unu caminu diferente dae cussu chi fiat istadu pensadu a s’incumintzu, ca carchi die faghet su Coro Santa Nostasia at pèrdidu unu cumponente istòricu, Mariolino Biancu chi at lassadu custa terra pro si aunire a su coro de sos ànghelos.
In unu primu momentu sos organizadores ant pensadu de istrascire sa manifestatzione in signu de lutu ma poi totu paris ant detzisu de la fàghere su matessi e de la dedicare a sa memòria de Mariolino. Difatis sa serada est incumintzada cun una litera iscrita dae sos cumponentes de su coro, lèghida dae Antoni Satta in ue ant contadu ammentos e sentidos chi ligant Mariolino a totus sos coristas e cun s’esibitzione de sa cantone “Su bolu de s’astore” pro ammentare sa passione chi isse aiat pro su cantu.
Emotziones e sentimentos ant acumpanzadu totus sa serada chi at caentadu su coro de totus cussos chi fiant presentes. “Semus cuntentos de comente est andada sa serada e torramus gràtzias a sos coros, a Carla e a totu su pùblicu pro s’afetu e s’atentzione mustrada.
Semus cun su coro pienu de tristura ma a su matessi modu semus orgolliosos de aere dedicadu custa manifestatzione a un’amigu chi nos at lassadu tropu in presse ma chi at a èssere semper un’eternu cumponente de su Coro” custas sas paràulas de Tonni Canu, presidente de su Coro Santa Nostasia de Uddusò.
