NOTÌZIAS E CONTOS LUNGONI. Àni presu avvìu, in chisti ciurràti di lu mesi di Sant’Andrìa, l’attivitài di “Pa’ li manni e pa’ li stéddhi”, lu progettu di l’Uffìciu di la Linga Gaddhurésa (Sportellu Linghisticu) vulùtu da l’amministraziòni cumunali pa’ sighì lu trabaddhu cuminciatu ill’anni passati, cu’ la ‘ulintài di galdà e dà valóri a lu gaddhurésu (varietài alloglotta).
L’attivitài, finanziata da la Legghji nùmmaru 482 di lu 1999 e da la Legghji Regionali nùmmaru 22 di lu 2018, à lu scòppu di faurì e prummuì la doppia linga (bilinghismu) illi lóchi undi s’agàttani più linghi di minurìa, punèndi l’operadóri di lu sportellu linghisticu indrèntu a la ‘ita di dugna dì di l’amministraziòni pùbbrica e di la ghjènti di Lungòni.
L’operadóri, chi pa’ còntu di l’Istitutu Chircas sò stati ingarrigati di sighì l’uffìci linghistichi di Lungòni, Santu Pascali e Lu Puzzu sò Anna Maria Giagheddu e Laura Mossa; iddhi, pal mèzu di lu sportellu, aràni a dà suppòltu linghisticu a la ‘jènti e saràni a dispusiziòni di scóli, associaziòni e di tutti li chi aràni piacéri o nizissittù di appustà attivitài linghistichi e culturali.
L’attivitài di sportellu sò indrèntu a un progèttu più spaltu cu’ una scóla di fulmaziòni di livellu faccili (basi) e ancóra la posta a puntu di diffarènti attivitài culturali distinati a la popolaziòni. Tutti l’attivitài fatti saràni palisàti pal mèzu di sitti istituzionali e paggini social, cu’ lu scòppu di garantìnni la massima visibilitài e inzingà la ‘jenti di lu lócu, li stragni e di l’amantiósi di chistu ramu a piddhanni palti.
Si podarà cuntrastà cu’ l’operadóri lu ghjoi da li 9 di matinata a mezudì andèndi di passòna a l’uffìciu, chi s’agatta illa Biblioteca cumunali di Lungòni, a Santu Pascali lu primma malti di lu mesi o a Lu Puzzu l’ultimu malti di lu mesi, ma ancóra pal mèzu di lu ‘ndirizzu mail sportellolinguisticos.teresa@gmail.com o innantu a la paggina facebook didicata – Uffìciu di la linga Gaddhurésa.
