NOTÌZIAS E CONTOS Chenàbura manzanu in s’aeroportu Costa Ismeralda de Terranoa, a sa presèntzia de amministradores locales e regionales, de isportivos e espertos de su setore de sas cursas est istada presentada a su pùblicu s’editzione nùmeru 7 de sa cronoiscalada de Tandalò.
Sa cursa naschet gràtzias a sa passione de unu grupu de amigos chi ant prima fatu nàschere custa manifestatzione e in pagos annos ant fatu a manera de la fàghere diventare una de sas cursas de machinas pius importante de Itàlia.
Difatis est un’apuntamentu chi in custos ùrtimos annos at leadu semper pius fua, finas a diventare un’eventu de importu mannu non solu pro sos apassionados de custu isport ma finas pro totu su territòriu de Uddusò e da sas àteras biddas de su monte acutu, ca dat movimentu meda finas in s’àmbitu de su turismu.
Testimonia de s’importàntzia de s’eventu est sa presèntzia, in sa cunferèntzia fata in s’aeroportu, de sos sìndigos de Uddusò, Alà, Padru e Patada ma finas cussa de Gianni Chessa, assessore regionale de su Turismu e de àteros cunsizeris e assessores de sa Regione Sardigna.
Sa gara, a sa cale si sunt iscritos pius de 100 partetzipantes, est prevista pro sàpadu 11 e domìniga 12 de custu mese e in Uddusò e in sas biddas de sas lacanas si sunt aspetende mizas de persones. “Semus orgolliosos meda de àere realizadu custu sònniu e de èssere resessidos, gràtzias a sa passione e a s’impignu chi b’amus postu, a fàghere connoschere su territòriu e sas bellesas de Uddusò e de sas biddas a curtzu in totu sa Sardigna e non solu.
Difatis est sa cuntentesa nostra cussa de àere fatu diventare sa Cronoiscalada de Tandalò un eventu de livellu internazionale” sas paràulas de Gigi Satta, presidente de sa manifestatzione.
