NOTÌZIAS E CONTOS Sos sìndigos e sos assessores delegados dae sos Comunes de sa Comunidade Montana de su Monte Acutu in sa riunione fata in sa sede de sa comunidade in via Regione Sardegna in Monte, ant propostu, eletu e dadu s’incàrrigu de presidente a su sìndigu de Òschiri, Roberto Carta.
A pustis de pagu pius o mancu duos annos e mesu de presidèntzia de su sìndigu de Alà Francesco Ledda, como tocat a Carta su còmpitu de sighire sas fainas de sa Comunidade Montana, semper sighende in sas atividades e dende continuidade a sos traballos fatos e pensados finas a como.
Difatis su presidente nou, at a sighire su caminu signadu in sos annos passados dae sos presidentes Andrea Nieddu e Francesco Ledda, chirchende de rapresentare a sa menzus manera sos problemas de su territòriu e de mandare a dae in antis sas atividades finas gràtzias a sos finantziamentos giai retzidos dae s’ente.
Su còmpitu de Carta at a èssere cussu de sighire in sas fainas cumintzadas in custos annos, cun s’obietivu de amparare sas comunidades e de sighire a dare a sas biddas de Alà, Belchidda, Monte, Padru, Oschiri e Uddusò unu ruolu de importu mannu in su territòriu de sa provìntzia Nord-Est e in totu su panorama regionale de s’isula.
“So cuntentu meda de sa proposta e de sa nòmina de presidente. Torro gràtzias a s’amigu e collega Francesco Ledda, chi in custos annos at ghiadu cun sabidoria e echilìbriu sa Comunidade Montana. Cun sos collegas de sos comunes chi faghent parte de s’ente amus a chircare de agabbare sos progetos chi bi sunt e amus a propònnere àteras atividades chi ant a faghere parte de sa programmatzione noa. Amus a incumintzare deretos e cun impignu meda, cun s’isperàntzia de dare rispostas bonas a sas preguntas de sa comunidade” sas paràulas de su presidente Roberto Carta a su cale auguramus bona fortuna pro custa aventura noa.
