NOTÌZIAS E CONTOS Rennovu su de bátoro de sos ingàrrigos de sa Proloco de Alà, torrada in vida in su 2011. E daboi de tres presidentes fèminas, a èsser giamadu a ghiare su sòtziu est como un òmine: chie 13 annos faghet, dae assessore comunale a sas fenàntzias, torreit in posse sa camedda turìstiga alaesa.
In sa prima reunione, su consizu de sos derigentes votadu su 21 de giannarzu, at difatis intregadu sa presidèntzia de sa Pro loco alaesa a su sòciu istòrigu Roberto Mette. Chi duncas pro sa prima borta si ponet a cabu de su sòtziu dae isse mantessi torradu in posse, daboi de s’istrobu de comintzu de sèculu.
A lu ajuare in custu, sa derigèntzia frommada dae Anna Rita Ghisu (vice-presidente), Mirella Contu, Antonella Mette (casciera) e Angela Ghisu (segretària), chin custa chi – sende prima de sas non eligidas – at leadu su postu de s’última presidentessa Antonella Scanu, chi pro impignos de tribàgliu s’at a dèvere istreare a fitianu dae Alà. Cuntrollore de sos contos Alberto Contu, daghì su cullègiu de sos probivìrios at a èssere frommadu dae Piera Pigozzi (eligida presidente de su cullègiu), Maria Lucia Pinna e Rosanna Bua.
Sa Proloco at a iscrìere dereta su programa de mustrare a s’amministrascione cumunale, sighende chin issa una cunlaboratzione nòdida e de profetu. S’at a punnare a pius pagos innìscios ma de mannesa pius ladina. At a èssere custa sa mudada pius de remeju. Cun s’iscopu de àere ancora pius pesu in s’isvilupu culturale e turìstigu de sa bidda, a manèra finas de inganire sos giovanos a s’acultziare a sa Pro loco, iscriende-si e lende parte a sas aprontadas suas.
